Fadil Nura do të jetë personi që do ta zëvendësojë Kadri Veselin në Kuvendin e Kosovës, shkruan Gazeta Sinjali.

Ish-nënkryetari i Komunës së Skenderajt, i cili në zgjedhjet e jashtëzakonshme për Kuvendin e Kosovës, në 2019, ka qenë kandidati i 17-të më i votuar për deputet nga radhët e Partisë Demokratike të Kosovës, do ta zë ulësen e Parlamentit të cilën e ka lënë të lirë Veseli.

Nura kishte shërbyer si zëvendës i Sami Lushtakut në Komunën e Skenderajt.

Madje, për gati tri vjet kishte shërbyer si ushtrues detyre i kreut të kësaj komune gjatë kohës sa Lushtaku, asokohe kryetar, ishte mbajtur në burg.

Nura ka marrë 8,959 vota në zgjedhjet parlamentare të vitit 2019. Më shumë sesa Xhavit Haliti e Ramë Buja, dy figura të moçme të PDK-së. /Gazeta Sinjali/