Kryeministri i Kosovës, Albin Kurti, në seancën plenare, u bëri thirrje publike profesionistëve të mërgatës dhe atyre në Kosovë që të bëhen pjesë e sektorit publik në shëndetësi, raporton Sinjali.
Kurti kërkoi të bëhen projekte për bashkëpunim me specialistët, duke thënë se synimi i Qeverisë është që jo vetëm ta zvogëlojnë listën e pritjes, por edhe ta përmirësojnë sistemin e shëndetësisë.
Kryeministri tha se ata po përpiqen të krijojnë një sistem që i bën mjekët që nëse shkojnë jashtë vendit të avancohen, por që të kthehen përsëri në Kosovë. Megjithatë nuk e mohoi faktin se mjekët po ikin.
Kryeministri i Kosovës Albin Kurti ka deklaruar se mjekët që vendosin të punojnë vetëm më sektorin publik do të kenë shtesë të veçantë të pagës.
“Profesionistët shëndetësor do të kenë trajtimin e dinjitetshëm në raport me shkollimin. Përveç pagës dhe shtesave standarde, profesionistet shëndetësor që vendosin të punojnë vetëm në sektorin publik ta kenë edhe shtesën e veçantë…Urgjenca për Ligjin e Pagave ka qenë dhe mbetet në planifikimin sa më të afërt të shtetit”, ka thënë Kurti gjatë fjalës së tij në Kuvendin e Kosovës.
