Kryeministri i Kosovës, Albin Kurti pas mbledhjes së përbashkët mes dy qeverive në një konferencë për media ka folur për çështjen e bashkimit në mes të Kosovës dhe Shqipërisë, shkruan Gazeta Sinjali.

Ai tha se kjo çështje është më shumë moskuptim sesa keqkuptim. Kjo pasi sipas tij, nuk munden që të vendosen mbi procese dhe të përcaktojnë data e mënyra.

“Mu më duket që ka më shumë një moskuptim sesa keqkuptim, tek  çështja e bashkimit të shqiptarëve. Ai nuk është një gjësend të cilin e zgjedhim apo e përzgjedhim. Pra ai është një intencë kolektive që na zgjedh ose përzgjedh neve. Prandaj nuk mund të vendosemi ne mbi procese të tilla historike e të përcaktojmë data e mënyra”, ka thënë Kurti.

Ndërkaq, kryeministri i Shqipërisë, Edi Rama në konferencë është pyetur se si do të votonte nëse do të bëhej një referendum për bashkimin kombëtar.

Rama e ka quajtur provokim pyetjen nga gazetari kosovar, por është përgjigjur se nëse do të bëhej një referendum për bashkimin kombëtar, ai do të votonte hapur “po”.

“Kjo është pyetje apo është “provokacja” sepse unë s’kuptoj. Në rast se më pyesni në hipotezën e një referendumi paqësor për bashkimin e Shqipërisë me Kosovën, unë do bëja një shkelje të Ligjit për fshehtësinë e votës, do votoja hapur “po”, meqë më provokoni, po ju provoj edhe unë. E di që do të ndodhi, por s’e di kur. Një ditë që do të ndodhi, them po”,  , ka deklaruar Rama. /GazetaSinjali/