Kryeministri i Kosovës, Albin Kurti, përmes një shkrimi në Twitter ka folur në lidhje me situatën në veri të vendit.
Ai ka thënë se bashkë me KFOR-in po punojnë ta adresojmë situatën në mënyrë paqësore.
“Në bashkëpunim me KFOR-in ne po punojmë për ta adresuar situatën shpejt dhe në mënyrë paqësore”, ka shkruar ndër të tjera Kurti.
Tutje Kryeministri i Republikës së Kosovës, Albin Kurti, i thotë Vuçiqit se Kosova nuk kërkon konflikt por kërkon paqe dhe dialog, megjithatë territori ynë “do të mbrohet me vendosmëri dhe forcë”.
Këtë deklaratë kryeministri Kurti e dha pas kërkesës së Vuçiqit për vendosjen e një numri trupash të ushtrisë dhe policisë serbe në Kosovë.
“Presidenti dhe kryeministrja e Serbisë kanë kërcënuar edhe me agresion ushtarak, duke kërkuar që ushtria serbe të kthehet në territorin tonë. Ne nuk kërkojmë konflikt, por dialog dhe paqe. Por më lejoni të jem i qartë: Republika e Kosovës do të mbrohet me vendosmëri dhe forcë”, ka shkruar Kurti.
Presidenti serb Aleksandar Vuçiç tha të shtunën se Serbia do t’u kërkojë forcave paqeruajtëse të NATO-s që ta lejojnë vendosjen e një numri trupash të ushtrisë dhe policisë serbe në Kosovë.
Ai i bëri këto komente në një konferencë me gazetarë në Beograd në të cilën tha sa Serbia do t’i shkruajë letër komandantit të forcave të KFOR-it.
