Në Kosovë janë konfimuar dy rastet e para të koronavirusit.

Lajmin e ka konfirmuar ministri i Shëndetësisë, Arben Vitia, i cili njoftoi se njëri nga të infektuarit është një 77 vjeçar nga Vitia, ndërsa tjetra një 20 vjeçare shtetase italiane e cila kishte ardhur para disa ditëve nga Italia dhe po qëndronte në Klinë.

Lidhur me këtë ka reaguar kryetari i Komunës së Klinës, Zenun Elezaj, i cili konfirmoi se 20 vjeçarja është pjesë e organizatës CARITAS e cila vepron në komunën që ai udhëheq.

Tutje, Elezaj njoftoi se ka filluar vendosja në karantinë e disa familjeve me të cilat kjo shtetase ka pasur kontakte.

“Personi i prekur me këtë virus është dërguar në QKUK ku po merr trajtim, ndërsa ka filluar vendosja në karantinë e disa familjeve me të cilat kjo shtetase ka pasur kontakte. Apeloj tek të gjithë qytetarët që të mos krijohet panik, por që t’i zbatojnë me përpikëri këshillat e Organizatës Botërore të Shëndetësisë(OBSH), të rrisin kujdesin ndaj higjienës dhe të ndalojmë përshëndetjet me duar”, thuhet në reagimin e kryetarit Elezaj të postuar në rrjetin social Facebook.

Elezaj po ashtu ka lutur qytetarët që të zvogëlojnë lëvizjet dhe kontaktet me qytetarë të tjerë, si masa preventive./GazetaSinjali/