Të paktën 34 emigrantë nga Afrika Sub-Sahariane – përfshirë fëmijë dhe foshnja – janë zhdukur në brigjet e Tunizisë pasi varka e tyre u përmbys.
Është anija e pestë me emigrantë që mbytet në dy ditë, me shtatë persona të konfirmuar të vdekur deri më tani dhe 67 ende të zhdukur.
Varka besohet se ishte nisur drejt Italisë.
Roja bregdetare tuniziane thuhet se ka ndaluar 56 anije të largohen nga vendi, me destinacion Italinë, në dy ditët e fundit.
Houssem Jebabli nga Garda Kombëtare Tuniziane tha se më shumë se 3,000 emigrantë ishin arrestuar duke u përpjekur të largoheshin nga vendi.
Tunizia është kthyer në një pikënisje për emigrantët për t’u larguar drejt Italisë. Të dhënat e Kombeve të Bashkuara tregojnë se të paktën 12,000 emigrantë që mbërritën në Itali këtë vit u larguan nga Tunizia, ndërsa vitin e kaluar ishin 1,300 në të njëjtën periudhë kohore.
Muajin e kaluar, presidenti tunizian Kais Saied akuzoi emigrantët afrikanë nën-Saharianë që jetojnë në vend se shkaktuan një valë krimi dhe i përshkroi ata si një kërcënim demografik.
Komentet e tij u kritikuan gjerësisht nga Bashkimi Afrikan dhe u denoncuan si “gjuhë raciste të urrejtjes” nga grupet e të drejtave të njeriut.
Duke folur në një samit në Bruksel të premten, kryeministrja italiane e ekstremit të djathtë Giorgia Meloni paralajmëroi se mund të ketë një “valë migrimi” drejt Evropës nëse situata politike dhe ekonomike e Tunizisë nuk stabilizohet.
Tunizia po përballet aktualisht me krizën e saj më të keqe financiare, pasi negociatat për një kredi me Fondin Monetar Ndërkombëtar (FMN) u bllokuan.
Sekretari amerikan i Shtetit Antony Blinken ka paralajmëruar gjithashtu se Tunizia duhet urgjentisht të arrijë një marrëveshje shpëtimi me FMN-në.
Tunizia është përballur gjithashtu me sfida të rëndësishme politike që nga korriku i vitit 2021, kur Saied mori shumicën e pushteteve, mbylli parlamentin dhe u zhvendos për të qeverisur me dekret.
