image Krasniqi i reagon Kurtit për grevën: Fëmijët po e pësojnë nga varësia jote për t'u treguar i fortë ndaj sindikalistëve

Politikë

Krasniqi i reagon Kurtit për grevën: Fëmijët po e pësojnë nga varësia jote për t’u treguar i fortë ndaj sindikalistëve

news image

Kryetari i Partisë Demokratike të Kosovës, Memli Krasniqi i ka bërë thirrje kryeministrit Albin Kurtit që të tregohet burrështetas e të gjejë zgjidhje që fëmijët të kthehen në shkolla, e jo të mbajë inate politike prej pushtetari në dëm të nxënësve të Kosovës.

Krasniqi përmes një postimi në Facebook ka thënë se sot takimi ndërmjet kryeministrit, Albin Kurti dhe kreut të Këshillit Grevist, Rrahman Jashari është dashur të ketë marrëveshje, sepse dëmi i mosmarrëveshjes po shihet tashmë e 13 ditë.

Ai tha se familjeve, prindërve, e më së shumti fëmijëve sot ju duhet zgjidhja e jo bllokada.

“Burrështetasit nga pushtetarët i ndanë mënyra se si e shohin karakterin e qeverisjes. Për të parët, pushteti është marrëdhënie e qeveritarëve me të qeverisurit. Për të dytët, është pronësi mbi të qeverisurit. Ti Kryeministër, dialogun me sindikatat e ke nisur mbrapshtë dhe je duke e ushqyer mbrapshtë, tamam si një pushtetar, larg çdo cilësie të një burrështetasi”, shkroi Krasniqi.

Ai i ka bërë thirrje Kurtit që të ofroj kompromisin e mos të mbajë inat ndaj protagonistëve.

“Sot, janë qytetarët dhe fëmijët tanë, ata që janë më të dëmtuarit nga varësia jote për t’u treguar i fortë përballë sindikalistëve. E kjo nuk i takon një kryeministri. Nuk është cilësia jote si person, por premtimet tua ato që të kanë sjellë në pushtet. Nuk ka nevojë të jesh vëlla me askënd, por duhet të jesh kryeministër i përgjegjshëm për të gjithë. Prandaj, gjej rrugë dhe zhblloko situatën”, tha Krasniqi.

Kreu i PDK-së ka thënë se fëmijët duhet të jenë prioritet para çdo agjende tjetër.

“Nuk ka përgjegjësi më të madhe sot dhe as agjendë më të rëndësishme për ty si kryeministër i vendit, sesa ta rimendosh e të veprosh siç kërkon arsyeja e shëndoshë, që nesër nxënësit e mësimdhënësit të nisin rrugëtimin e vitit të ri shkollor. Fëmijët vijnë të parët, të tjerat pas tyre. Për të tjerat mund të të mirëkuptojmë. Për fëmijët s’mund të ta falim këtë arrogancë”, ka thënë ai.

/GazetaSinjali/