Meqë Kosova nuk po lejon që referendumi serb të mbahet në territorin e saj, zyrtarë nga e ashtuquajtura Zyra për Kosovën në Qeverinë e Serbisë kanë arritur marrëveshje me disa kompani kosovare për transportin e serbëve të Kosovës në Serbi, ku do të mund të votojnë.
Sinjali mëson se këta operatorë ekonomikë të transportit (emra të njohur për redaksinë) kanë bërë marrëveshje me udhëheqësit e kësaj zyreje, që t’i dërgojnë serbët e Kosovës në Kurshumli, Novi Pazar, Rashkë e Vranjë që të votojnë për referendumin serb.
Megjithëkëtë, për një gjë të tillë nuk e kanë as bazën e duhur ligjore, shkruan Gazeta Sinjali.
Legjislacioni nuk lejon që operatorët që nuk kanë linjë të rregullt të bëjnë transportimin e udhëtarëve jashtë shtetit, andaj një veprim i tillë mund të ketë pasoja për operatorët që zgjedhin të bëjnë transportin e udhëtarëve pa leje paraprake nga ministria e Infrastrukturës.
Sinjali nesër do të sjellë detaje se cilët operatorë janë angazhuar dhe çfarë masash mund të marrë ministria për gjobitjen e tyre, në rast se ata kthehen me udhëtarë në Kosovë.
