Republika e Kosovës ka vendosur sanksione ndaj Federatës Ruse dhe Bjellorusisë, pas zhvillimeve në Ukrainë.
Kjo u bë e ditur në mbledhjen e Qeverisë së Kosovës, e cila u mbajt pa praninë e kryeministrit Albin Kurti dhe u udhëheq nga zëvendëskryeministri, Besnik Bislimi.
Ai përmendi ShBA-të dhe Bashkimin Evropian të cilat kanë miratuar pakon e re, të sanksioneve ndaj Federatës së Rusisë.
Një nga sanksionet që përmendi zëvendësi i Kurtit, është edhe ngrirja e aseteve ndaj disa individëve dhe korporatave ruse.
Sanksionet u miratuan nga kabineti qeveritar.
Kosova më herët ka vendosur sanksione ndaj Rusisë, në vijë me Shtetet e Bashkuara të Amerikës dhe Bashkimin Evropian.
Kryeministri Albin Kurti kishte thënë se masat janë ekonomike, tregtare dhe financiare.
