Kosova është ende larg përfundimit të vaksinimit të popullsisë me vaksinën antiCOVID. Deri sot në Kosovë kanë vdekur 2.237 persona nga koronavirusi, shkruan Gazeta Sinjali

Numri total i rasteve pozitive në Kosovë është 107.120.

Sipas të dhënave të fundit të publikuara nga Instituti Kombëtar i Shëndetësisë Publike, numri i përgjithshëm i të shëruarve deri më sot është gjithsej 100.943 raste.

Numri i rasteve aktive është 3.940.

Më 12 maj, Kosova ka nisur fazën e dytë të vaksinimit të popullatës kundër koronavirusit, ku bëjnë pjesë personat e moshës 65-79 vjeç.

Vaksinimi në Kosovë ka nisur në fund të muajit mars, me 24,000 doza të vaksinës AstraZeneca, të siguruara nga programi Covax i Organizatës Botërore të Shëndetësisë.

Javën e kaluar, Kosova ka marrë edhe mbi 38,000 doza të tjera vaksinash nga Covax, ndërkohë mbi 7,000 doza të tjera i ka siguruar si donacion nga Bashkimi Evropian.

Sipas raportimeve të Ministrisë së Shëndetësisë, në fazën e tretë do të fillojë vaksinimi masiv i qytetarëve dhe Ministria e Shëndetësisë e Kosovës thotë se është planifikuar imunizimi i 50-70 për qind të popullsisë.

Megjithatë, Kosova ende është në fazën e vaksinimit të personave mbi moshën 65-vjeçare. /Gazeta Sinjali/