Koreja e Jugut ka rënë dakord t’i japë SHBA-së 500,000 predha artilerie 155 mm, sipas një raporti, në një lëvizje që mund t’i japë Uashingtonit fleksibilitet më të madh për të furnizuar Ukrainën me municion.
Qeveria e Seulit ka vendosur të “huazojë” në vend që t’i shesë municionet SHBA-së, në mënyrë që të minimizojë mundësinë e përdorimit të predhave të Koresë së Jugut në konfliktin në Ukrainë, raportoi Dong-a Ilbo, duke cituar burime të paidentifikuara qeveritare.
Raporti erdhi pasi dokumentet e fshehta të ushtrisë amerikane të zbuluara treguan detaje rreth diskutimeve të brendshme midis zyrtarëve të lartë të Koresë së Jugut rreth presionit të SHBA ndaj Seulit për të ndihmuar furnizimin me armë në Ukrainë, dhe politikën e saj për të mos e bërë këtë.
Koreja e Jugut, një aleat kyç i SHBA-së dhe një prodhues i madh i municioneve artilerie, ka rënë dakord të sigurojë qindra tanke, avionë dhe armë të tjera për Poloninë që nga pushtimi i plotë i Ukrainës nga Rusia më shumë se një vit më parë.
Por presidenti i saj, Yoon Suk Yeol, ka thënë se nuk mund t’i ofrojë armë vdekjeprurëse Ukrainës, duke përmendur situatën e sigurisë së vetë vendit mes kërcënimeve bërthamore dhe raketore në zhvillim nga Koreja e Veriut.
Gazeta citoi një burim të thoshte:
“Ne kemi zgjedhur të rrisim ndjeshëm vëllimin e predhave, por kemi përdorur metodën e marrjes me qira, pasi kemi eksploruar se si t’i përgjigjemi kërkesës së aleatit të gjakut me mirëbesim, duke iu përmbajtur parimit të qeverisë për të mos ofruar armë vdekjeprurëse për Ukrainën.
Ministria e Mbrojtjes e Koresë së Jugut tha se aleatët e Ukrainës kanë eksploruar mënyra për ta mbështetur atë, por nuk pranoi të konfirmonte diskutime specifike, raportoi Reuters. Departamenti Amerikan i Shtetit nuk ofroi menjëherë koment.
