Kryetari i Kuvendit të Republikës së Kosovës, Glauk Konjufca, ka pritur sot në takim ambasadorin e Shtetit të Katarit, jorezident në Republikën e Kosovës, Jabor Ali Hussein Al Hawashela Al Dosari, të cilin e ka uruar për detyrën dhe ka vlerësuar lart marrëdhëniet e shkëlqyera mes dy shteteve tona.
Nga Kuvendi njoftojnë se Konjufca shprehu mirënjohje për Shtetin e Katarit, për mbështetjen që i ka dhënë Kosovës në forcimin e subjektivitetit ndërkombëtar dhe anëtarësimin në organizata ndërkombëtare.
Ndërkaq, duke e falënderuar Konjufcën për pritjen, Al Dosari ritheksoi vazhdimin e përkrahjes së vendit të tij për Kosovën.
“Kryetari Konjufca dhe ambasadori Al Dosari shprehën gatishmërinë për avancimin e raporteve miqësore dhe zgjerimin e mundësive të bashkëpunimit në fusha të ndryshme ndërmjet Republikës së Kosovës dhe Shtetit të Katarit”, theksohet në kumtesën për media.
