Ushtruesi i detyrës së Presidentit të Kosovës, Glauk Konjufca, ka reaguar pas vdekjes së humoristit Rasim Thaçi-Cima, shkruan Gazeta Sinjali.
Sipas një postimi, Konjufca tha se humori i tij kishte qenë thellësisht politik edhe atëherë kur nuk është dukur si i tillë.
“Humori i Rasim Thaçit ka qenë thellësisht politik edhe atëherë kur nuk është dukur i tillë. Çdo herë ka pasur porosi të mprehta brenda skeçeve të tij. Humori që e bënte Treshi Përsheshi gjatë viteve ’90 nuk ishte thjesht zbavitje, por aktivizëm politik”, shkroi ndër të tjera Konjufca në Facebook.
Postimi i plotë i Konjufcës:
“E nderuar familje Thaçi!
Sot e morëm lajmin e trishtë për ndarjen nga jeta të bashkëfamiljarit tuaj, ikonës sonë të humorit, z. Rasim Thaçi – Cima.
Ai nuk u dorëzua, duke bërë që me humorin e tij të na lehtësojë sadopak ditët e vështira nëpër të cilat kaloi populli ynë.
Ndarja e tij nga jeta është humbje e madhe jo vetëm për familjen, por edhe për Kosovën.
Ai u nda nga kjo jetë, por e la pas vetes një karrierë të pasur në zhanrin e humorit.
Në këto çaste të vështira për ju, bashkëndjej me ju për ndarjen nga jeta të z. Rasim Thaçi – Cima.
I përhershëm qoftë kujtimi për të!”
