Të shtunën në Aeroportin e Shkupit janë konfiskuar rreth 1 milion euro të falsifikuara.

Lidhur me këtë rast, janë arrestuar dy shtetas të Kamerunit, në bagazhet e të cilëve u gjetën paratë, raporton Alsat-M.

Zëdhënësja e Ministrisë së Punëve të Brendshme, Suzana Pranjiq, ka dhënë detaje për këtë operacion policor.

“Te T.P.F. janë gjetur 2.591 copa letre të prera në të cilat nga të dy anët është shtypur pjesë e dizajnit të bankënotave prej 50 euro, 2.363 copa letre me pjesë të shtypur të dizajnit të bankënotave prej 100 euro, 463 copa me pjesë të dizajnit të bankënotave prej 200 euro, 213 me dizajn të bankënotave 500 euro, 2 copa letre të prera në të cilat njëra anë është shtypur me më shumë ngjyra, pjesë të dizajnit të bankënotave prej 50 euro, 78 copa letre të prera pa asnjë lloj shenje, si dhe dy shishe me lëndë të UV-llambës.”

“Tek i dyshuari i dytë janë gjetur 2.072 copa letre të prera me prapavijë të zezë në të cilat te të dy anët janë shtypur pjesë të dizajnit të bankënotës prej 50 eurove, 1.321 copa të tilla me pjesë të shtypur të dizajnit të bankënotës prej 100 euro, 247 copa me të bankënotës 200 euro, 104 me dizajnë të bankënotës 500 euro, një letërnjoftim francez, si dhe një dokument udhëtimi të Kamerunit.”

Mjetet e sekuestruara i janë dorëzuar Bankës Popullore dhe sektorit për hetime teknike-kriminalistike, të cilët kanë konstatuar se ekzemplarët janë imitime të bankënotave euro me vlerë 50-100-200 dhe 500 euro të punuara me pajisje profesionale.

Pas dyshimeve se është tentuar që këto bankënota të falsifikuara të lëshohen në treg, Prokuroria e Shkupit ka ngritur padi penale për dy shtetasit e Kamerunit./Gazeta Sinjali/