Grupi Parlamentar i Aleancës për Ardhmërinë e Kosovës (AAK), në bashkëpunim me grupet parlamentare të Partisë Demokratike të Kosovës (PDK) dhe Nismës Socialdemokrate, i kanë dorëzuar sot Kryesisë së Kuvendit të Kosovës Mocionin për Interpelancë me ministrin e Integrimit Evropian, Blerim Reka.

Shkarkimi i ministrit Reka po kërkohet për shkak se në një prononcim të mëhershëm, derisa fliste për marrëveshjen finale të Kosovës me Serbinë, propozoi që asaj t’i jepet korridori transit për dalje në detin Adriatik përmes Kosovës.

“Grupet tona parlamentare konsiderojnë që deklarata e Ministrit është antikushtetuese, prandaj në këtë interpelancë do të votohet një rezolutë përmes së cilës do të kërkohet shkarkimi i tij nga pozita e Ministrit për Integrimin Evropian”, thuhet në postimi e Grupit Parlamentar të AAK-së në rrjetin social Facebook./GazetaSinjali/