Kryetari i Partisë Demokratike të Kosovës, Kadri Veseli ka thënë se kryeministri i ri i Kosovës, Albin Kurti po ngutet në lidhje me heqjen e taksës për të përmbushur kërkesat e Serbisë dhe për të rehatuar Listën Serbe.

Veseli në një shkrim të publikuar në rrjetin social Facebook, e ka cilësuar vendosjen e taksës ndaj importeve serbe si vendim dinjitoz, teksa ka thënë se për këtë temë nuk duhet të ketë manovrime politike.

“Një qeveri ka rënë si pasojë e taksës, gjë që ka dobësuar për një kohë Kosovën. Prandaj, nuk duhet të ketë manovrime politike për këtë temë të ndjeshme, e cila rrezikon ta dëmtojë më tej vendin tonë. Qeveria e re duhet të mos të dorëzohet para Serbisë përpara sfidave dhe vendimeve të mëdha që e presin Kosovën”, ka shkruar ai në Facebook.

Kryeministri i ri i Kosovës, Albin Kurti gjatë ditës së djeshme pas takimit me shefen e zyrës së BE-së në Kosovë, Nataliya Apostolova, ka deklaruar se taksa ndaj importeve serbe duhet të zëvendsohet me reciprocitet.

Kujtojmë se Taksa 100% ndaj produkteve serbe është vendosur më 6 nëntor të vitit të kaluar nga Qeveria Haradinaj./Gazeta Sinjali/