Kryetari i SBASHK-ut, Rrahman Jasharaj, ka thënë se Qeveria e Kosovës duhet të procedojë pagat në arsim për muajin shtator, pasi një gjë e tillë është antikushtetuese dhe në kundërshtim me të drejtat e lirive të njeriut.
Ai ka thënë se kompensimi i orëve të humbura dhe ndryshimi i kalendarit të vitit shkollor nuk duhet të bëhen, ndonëse MASHTI sot vendosi për një gjë të tillë.
“Nuk ka më kushtëzime, ministrja Arbërie Nagavci dhe Qeveria e Kosovës duhet të procedojnë pagat për grevistët në arsim”, ka thënë Jasharaj për RTK.
Ndryshe, Qeveria e Kosovës nuk ka proceduar pagat për punonjësit në sistemin arsimor për shkak të grevës.
Ministrja e Arsimit, Arbërie Nagavci ka bërë të ditur se tashmë ministria që ajo drejton ka marrë vendim për kompensimin e orëve mësimore të humbura gjatë grevës së SBASHK-ut.
Në kuadër të këtij vendimi, MASHTI i ka bërë edhe një propozim Ministrisë së Financave lidhur me çështjen e pagave për mësimdhënësit.
Nagavci në postimin e bërë në Facebook, ka shkruar se në rast se punëtorët e arsimit do të respektojnë vendimin e ri për kalendarin e vitit shkollor 2022-2023, Ministria e Financave do të shqyrtojë mundësinë e pagesës në avans.
