Autoritetet italiane kanë ndaluar mbajtjen e koncerteve të Kanye West dhe Travis Scott, duke përmendur shqetësime për rendin publik dhe sigurinë.
Prefekti Salvatore Angieri njoftoi të premten se dy ngjarjet, të planifikuara të zhvilloheshin në korrik në qytetin verior italian Reggio Emilia, nuk do të mbahen. Vendimi erdhi pasi komuniteti hebre lokal kërkoi anulimin e koncertit të Kanye West.
Udhëheqësja e komunitetit, Nicoletta Uzzielli, u bëri thirrje autoriteteve lokale që shfaqja të zëvendësohej me një performancë që do ta kthente “muzikën në qendër si një forcë universalisht bashkuese”.
Kanye West ka shkaktuar reagime të ashpra për shkak të një sërë deklaratash antisemitike, raciste dhe pro-naziste, të cilat së fundmi çuan edhe në ndalimin e hyrjes së tij në Mbretërinë e Bashkuar.
Reperi amerikan, i njohur tashmë me emrin Ye, ishte planifikuar të performonte së bashku me Travis Scott dhe artistë të tjerë si The Chainsmokers, Rita Ora dhe Swedish House Mafia.
Prefektura rajonale tha në një deklaratë se në vendim kanë ndikuar disa faktorë, përfshirë “anulimin e koncerteve të mëparshme të reperit amerikan në vende të tjera dhe rrezikun real të kundërprotestave”.
Sipas autoriteteve, një faktor shtesë ishte edhe afërsia kohore e dy eventeve, të planifikuara për 17 dhe 18 korrik në RFC Arena të Reggio Emilias, si dhe numri i madh i njerëzve që pritej të merrnin pjesë.
Edhe Travis Scott është përballur me kritika të forta pas tragjedisë në festivalin e tij Astroworld në Houston të Teksasit në vitin 2021, ku humbën jetën 10 persona të moshës nga 9 deri në 27 vjeç.
Mijëra të tjerë u lënduan kur shpërtheu paniku dhe turma, e tejmbushur përtej kapacitetit të lejuar, u shty drejt skenës gjatë performancës së reperit.
Ndërkohë, festivali Wireless në Londër, i planifikuar për këtë verë, u anulua muajin e kaluar pasi West, i shpallur si artisti kryesor, nuk mori leje për të hyrë në Mbretërinë e Bashkuar për shkak të reagimeve ndaj deklaratave të tij të mëparshme.
Në vitin 2022, West publikoi në rrjetet sociale një mesazh ku shkruante se do të kalonte në “death con 3 ndaj hebrenjve”, ndërsa në maj të vitit të kaluar publikoi këngën “Heil Hitler” dhe shiti bluza me simbole të svastikës naziste.
Ndalimi i hyrjes së tij në Britani u pasua nga anulime të tjera.
Më 15 prill, West njoftoi se koncerti i planifikuar në Marseille të Francës ishte shtyrë “deri në një njoftim të dytë”. Mediat franceze raportuan në atë kohë se ministri i Brendshëm, Laurent Nuñez, po shqyrtonte mundësinë e ndalimit të koncertit të 11 qershorit.
Edhe koncerti i tij i planifikuar për 19 qershor në stadiumin Silesian në Chorzów të Polonisë u anulua për “arsye formale dhe ligjore”, sipas organizatorëve.
Reperi ka tentuar të rikthehet në vëmendjen e publikut pas një kërkimfaljeje të gjatë të publikuar në Wall Street Journal në janar.
“Nuk jam nazist dhe as antisemit. I dua hebrenjtë”, shkroi ai.
Sinjali – aty ku e vërteta flet para lajmit!
