Rastet kur personat zyrtarë janë cak i kërcënimeve e sulmeve, sidomos në vendin e punës, sa vijnë e shtohen, duke krijuar kështu pasiguri nëpër institucione lokale e qendrore. Vetëm në dy ditët e fundit, Gazeta Sinjali ka raportuar për disa raste të tilla, që kanë ndodhur në tri komuna të vendit, ku e kanë pësuar zyrtarët për shkak të ushtrimit të detyrës zyrtare.
Përveç nivelit lokal, një rast i tillë ka ndodhur edhe në pushtetin qendror. Bëhet fjalë për Ministrinë e Infrastrukturës, ku zyrtari i një departamenti është kanosur seriozisht nga një qytetar.
Sinjali ka mësuar se ngjarja ka ndodhur dje, rreth orës 13:45, në Qendrën e Patentë Shoferëve në Gjilan.
Zyrtari i këtij departamenti A.A., është kanosur nga një qytetar, i cili i kishte shkuar në zyrë bashkë me një person tjetër.
Kanosjes, dyshohet se i parapriu një ngatërresë mes dy të dyshuarve që i shkuan në zyrë zyrtarit.
Për shkak të shqetësimit që i ka shkaktuar ky rast, zyrtari në fjalë e ka denoncuar rastin në Polici.
Njësia e Hetimeve është vënë menjëherë në veprim, me ç’rast i dyshuari kryesor është shoqëruar në Polici.
Pas përfundimit të procedurave, prokurorja ka urdhëruar ndalimin e të dyshuarit, në kohëzgjatje prej 48 orësh, si i dyshuar për kanosje.
