Në varrezat e fshatit Broboniq të Mitrovicës është varrosur sot Ajshe Veseli, nëna e ish-kryetarit të Kuvendit, Kadri Veselit.
Në ceremoninë e varrimit kanë marrë pjesë shumë familjarë e miq të familjes Veseli.
Të pranishëm ishin krerët e Partisë Demokratike të Kosovës. Kryetari i saj, Memli Krasniqi, tha se ky varrim njëjtë si para gjashtë muajve, bëhet i vështirë pasi nuk është në mesin e tyre edhe ish-kryetari i partisë, Kadri Veseli.
“Na vjen keq për rastin e sotëm, humbjen e nënës Ajshe ka qenë një zojë, një grua e fortë bujare. Në këtë moment kjo vdekje ky varrim bëhet më i vështirë për faktin se as këtë herë siç ndodhi para 6 muajsh me babin e tij nuk ishte në mesin tonë miku ynë, kryetari Kadri Veseli”.
“Kjo e bënë edhe më të dhimbshme këtë rast, gjithsesi ne shpresojmë që edhe kjo betejë e fundit tepër e rëndësishme me të cilën po ballafaqohet ai dhe bashkëluftëtarët e tij, është çmim i lartë por do të jetë beteja që do ta vulos drejtësinë e luftës çlirimtare të Kosovës”, ka thënë Krasniqi.
E Hysni Veseli, djali i mixhës së Kadri Veselit, tha se nuk kanë informacione nëse e kanë lajmëruar Kadri Veselin. Ai me këtë rast ka falënderuar qytetarët për pjesëmarrjen e tyre në këtë varrim.
“Ju e dini që Veseli është në paraburgim, dhe nënkupton kufizim të lirisë, nuk kemi informacion për këtë çështje. I falënderoj të gjithë qytetarët të cilët kanë qenë për nderimin që janë kanë bërë nënës Ajshe. Ajo ka qenë një gjeneratë e luftës së dytë botërore faktikisht ne po e hupin edhe këtë gjeneratë, për neve ka qenë një krenari.
“Nënat tona nuk kanë qenë nëna as të as të interesave, kamerave e të fjalimeve, por ka qenë nëna që na kanë eduku, kanë kultivua dashuri shumë përkujdes për fëmije dhe atdhedashuri”, tha ai për EO.
Për fund ai tha “Shpresojmë se do të takohemi në ditë më të mira me plotë vetëbesim”.
