Kryeministri në largim, Avdullah Hoti, duket se nuk do të “hakmerret” ndaj kryeministrit të sapozgjedhur, Albin Kurti, i cili nuk ia kishte dorëzuar vetë detyrën kur ky i pari u votua për kreun e ekzekutivit, shkruan Gazeta Sinjali.

Hoti para gazetarëve mbrëmë tha se do t’i dorëzojë Kurtit detyrën dhe informatat e plota të proceseve që kanë mbetur në gjysmë.

“Kryeministrit të ri do t’ia dorëzojë informatat e plota për procesin e integrimit evropian, për nivelin e zbatimit të MSA-së, për programet IPA që i kemi zhvilluar, për diskutimet që i kemi bërë veç e veç me vendet e Bashkimit Evropian në procesin e liberalizimit të vizave. Do t’i dorëzoj informatat e plota për procesin e dialogut, si është zhvilluar deri më tash, përgatitjet që janë bërë, ekspertët që kanë qenë të angazhuar, dakordimet e miqve tanë ndërkombëtarë. Do t’i dorëzoj informatat për marrëveshjen e Washingtonit”, u shpreh Hoti.

Kurti u zgjodh kryeministër në seancën e djeshme të Kuvendit me 67 vota për, 30 kundër dhe asnjë abstenim./Gazeta Sinjali/