Për shkak të ngritjes së aktakuzës së Specialës ndaj presidentit të Kosovës, Hashim Thaçit, tanimë nuk ka ndonjë datë të caktuar për rifillimin e dialogut Kosovë-Serbi.

Kryeministri i Kosovës, Avdullah Hoti e thotë sërish se ky proces do të udhëheqet nga vet ai dhe se për çdo zhvillim do t’i raportojë Kuvendit.

“Kryeministri në bazë të Kushtetutës është në krye të dialogut, i cili koordinon punën edhe të këshillit të ekspertëve dhe të forumit të liderëve dhe komunikimi me Kuvendin, unë do t’i raportoj Kuvendit për çdo zhvillim në procesin e dialogut”, ka deklaruar sot Hoti.

Hoti gjithashtu ka deklaruar se Këshilli i Ekspertëve i formuar nga Qeveria, do ta mbështesë qeverinë në dialog.

“E kemi formuar një trupë që është këshilli i ekspertëve që është brenda Zyrës së Kryeministrit që do të mbështesë profesionalisht në procesin e dialogut”, ka thënë Hoti.

Kujtojmë se BE-ja ka deklaruar se në korrik do të fillojë dialogu, ndërsa SHBA-ja ende nuk e kanë caktuar datën e një takimi. /Gazeta Sinjali/