Ministria e Infrastrukturës ka njoftuar se me verifikimin e të dhënave nga prodhuesit për heqjen e homologimit për veturat e reja, përgjegjës do të jenë kompanitë e autorizuara për shitjen e tyre në tregun e Kosovës.

“I njëjti verifikim do të vlejë edhe për blerësit kur kryejnë regjistrimin e veturave”, thuhet në njoftimin e MI-së, transmeton Gazeta Sinjali.

Njoftimi i plotë:

Ministria e Infrastrukturës dhe Transportit, njofton qytetarët e Republikës së Kosovës se duke u bazuar në legjislacionin në fuqi, ka filluar procedurat e liberalizimit të procesit të homologimit.

Në kuadër të kësaj, ju informojmë se MIT ka marrë vendim që veturat e reja, të importuara nga kompanitë e licencuara, nuk do t’i nënshtrohen më homologimit nga kompania e autorizuar për kryer atë. Për verifikimin e të dhënave nga prodhuesit, përgjegjës do të jenë kompanitë e autorizuara për shitjen e tyre në tregun e Kosovës. I njëjti verifikim do të vlejë edhe për blerësit kur kryejnë regjistrimin e veturave.

Ky është një hap i ndërmarrë nga ministri i Infrastrukturës dhe Transportit Pal Lekaj, drejt lehtësimit të procedurave dhe uljes së kostos të cilën duhet të paguajnë qytetarët.

Ndryshe, vendimin për anulimin e homologimit për automjetet e reja të cilat janë prodhuar në tregun e Bashkimit Evropian e ka mbështetur Zyra e Bashkimit Evropian në Kosovë. /Gazeta Sinjali/