Ministrja e Drejtësisë, Albulena Haxhiu, ka folur për kërkesën e Serbisë që zgjedhjet parlamentare dhe presidenciale të 3 prillit të mbahen edhe në Kosovë.
Ajo, në konferencë për media, tha se Serbia s’po e kërkon një gjë të tillë për shkak se brengoset që qytetarët e saj, që kanë dy shtetësi, të ushtrojnë të drejtën e votës, por se ka pretendime territoriale këtu.
“Të gjithë jemi në dijeni se Serbia i ka pretendimet e saj për të mbajtur zgjedhjet e saj në Kosovë jo pse kërkon që një e drejtë e qytetarëve të tyre të adresohet, mirëpo sepse ka pretendime territoriale ndaj Kosovës. Serbisë s’i bëhet vonë për të drejtat e qytetarëve, por përmes atij veprimi do që të jetë në linjë me Kushtetutën e saj”.
Haxhiu tha se Qeveria dhe Kuvendi mbajnë të njëjtin qëndrim si për referendumin kushtetues të Serbisë, që u ndalua të mbahet, duke shtuar se njëlloj mendon edhe presidenca.
Megjithatë, ajo tha se qytetarët serbë që jetojnë në Kosovë mund të votojnë për zgjedhjen e presidentit dhe legjislativit në Serbi përmes Zyrës Ndërlidhëse në Kosovë ose me postë – ashtu siç u propozua edhe për referendumin e 16 janarit.
“Qeveria dhe Kuvendi i Kosovës e kanë nxjerrë një rezolutë ku e kanë ndaluar mbajtjen e referendumit kushtetues më 16 janar. Konsiderojmë që është jashtëzakonisht e rëndësishme që të respektohet Kushtetuta e Republikës së Kosovës, por edhe legjislacioni në fuqi”.
“Edhe rezoluta e Kuvendit dhe qëndrimet e Qeverisë janë në linjë të njëjtë dhe po ashtu këtë qëndrim e ka edhe presidentja e vendit. Qytetarëve të cilët kanë dy nënshtetësi duhet t’iu ofrojmë zgjidhje dhe ne zgjidhjen e kemi dhënë – të votohet në zyrën ndërlidhëse në Kosovë apo me postë. Këto janë dy propozimet që ne i kemi thënë edhe publikisht dhe nuk ka diçka tjetër në këtë drejtim”.
