Teksa ka folur për raportet me Shtetet e Bashkuara të Amerikës, Kryeministri në detyrë, Ramush Haradinaj, ka theksuar se burrështetasit amerikanë nuk e duan servilizmin.

Në një intervistë për televizionin publik, Haradinaj ka deklaruar se Amerika është aleate e Kosovës, por jo e politikanëve të caktuar, duke aluduar në këtë rast në kundërkandidatin e tij nga PDK, Kadri Veseli, i cili po pretendon se gëzon mbështetjen e administratës amerikane.

“Për mua thoshin u prishë me Amerikë, por unë në ditën e parë të fushatës isha në Amerikë. Amerika është aleate e Kosovës, nuk është e politikanëve. Nëse dimë me punu në të drejtën e popullit tënd, edhe nëse nuk pajtohen nuk të pengojnë. Servilizmin nuk e çmojnë”, ka theksuar Haradinaj në RTK.

Sipas Haradinajt, për amerikanët është qenësorë që një politikan t’i mbrojë interesat e popullit të vet që të vënë besim mbi të.

“Ata nuk i pëlqejnë artificializmat. Ata janë të interesum me ditë se për çfarë qëndron. Nëse e shohin që nuk e mbronë interesin e popullit të vet, nuk të besojnë, se ti mund të bëhesh nesër edhe me Iranin e Rusinë”, ka theksuar Haradinaj./Gazet Sinjali/