Kryeministri në detyrë, Ramush Haradinaj, ka reaguar pas tërmetit të fuqishëm që goditi mbrëmë Turqinë, ku si pasojë mbetën dhjetëra të vdekur e mijëra të lënduar.

Haradinaj ka thënë se institucionet e Kosovës janë të gatshme për ndihmat e nevojshme humanitare, përfshirë edhe njësitë operacionale nga FSK-ja, shkruan Gazeta Sinjali.

Ai përmes një shkrimi të publikuar në rrjetin social Facebook, ka thënë se Kosova në këtë tragjedi qëndron pranë shtetit të Turqisë.

Ky reagim i kryeministrit në detyrë vjen 15 orë pasi që Turqia është goditur nga ky tërmet. Teksa i menjëhershëm ishte reagimi i presidentit të vendit, Hashim Thaçi, i cili mbrëmë përmes një shkrimi të publikuar në Twitter, ka thënë se Kosova është e gatshme të dërgojë njësitë operacionale nga FSK-ja.

Në fakt Haradinaj nuk ka aspak raporte të mira me Erdoganin. Këto raporte kishin filluar që nga koha e deportimit të gjashtë shtetasve të Turqisë, të cilët akuzoheshin nga shteti turk si anëtarë të organizatës së Fetullah Gylenit.

Shteti i Turqisë u godit mbrëmë nga një tërmet me magnitudë 6.9, ku si pasojë mbetën të vdekur 21 persona dhe mbi 1 mijë të tjerë të lënduar./Gazeta Sinjali/