Një grua amerikane dhe vajza e saj, e cila ishte rrëmbyer nga Hamasi, u liruan “për arsye humanitare”, njoftoi të premten përfaqësuesi i krahut të armatosur të organizatës, Brigada Al-Qassam, Abu Obayda.
Dy gratë tashmë i janë dorëzuar Kryqit të Kuq, i cili do t’i çojë në Egjipt dhe më pas në Izrael. Nuk dihet ende orari i kthimit.
Hamasi iu përgjigj përpjekjeve të Katarit për të liruar pengjet, shtoi organizata.
Organizata thekson se ajo ndjek përpjekjet e Katarit “për t’i provuar popullit amerikan dhe botës se pretendimet e Biden dhe qeverisë së tij fashiste janë të rreme dhe të pabaza”.
Ndërkohë, organet e medias (kanali televiziv Channel 13 News dhe Kan TV publik) përcjellin deklarata të zyrtarëve izraelitë duke theksuar se lirimi u bë në mënyrë të njëanshme nga Hamasi dhe nuk ishte pjesë e një marrëveshjeje me Izraelin.
Nuk ishte gjithashtu e qartë se ku u liruan gruaja amerikane dhe vajza e saj që u rrëmbyen më 7 tetor, kur anëtarët e Hamasit nisën një sulm në tokën izraelite.
Të enjten ushtria izraelite tha se kishte kontaktuar me familjet e 203 personave (kjo duhet të përfshijë të dyja gratë) që besohet se mbahen peng në Rripin e Gazës. Shumica e tyre janë izraelitë.
Autoritetet izraelite theksuan, megjithatë, se edhe ky numër nuk është përfundimtar sepse ende po hetohen informacionet për personat, fati i të cilëve nuk dihet që nga sulmi i Hamasit më 7 tetor./A2CNN/
