Gjykata Themelore e Prishtinës ua ka caktuar masën e paraburgimit prej 30 ditësh dy serbëve Zharko Zariqit dhe Momir Pantiqit, nën dyshimin se kanë kryer krime lufte në komunën e Istogut gjatë luftës në Kosovë.
Lajmin e kanë konfirmuar avokatët e tyre Nebojsha Vlajiq dhe Dejan Vasiq.
Kujtojmë se përmes një komunikate për media, Policia e Kosovës gjatë ditës së djeshme bëri të ditur se Zaric është arrestuar me dyshimet për krim lufte kundër popullatës civile në Kosovë në periudhën prej vitit 1998 deri në vitin 1998.
“Hetuesit policorë nga Drejtoria për Hetimin e Krimeve të Luftës (DHKL), kanë arritur që sot, më 05.08.2023, rreth orës 12:30, në fshatin Lubozhdë të komunës së Istogut të lokalizojnë dhe të arrestojnë të dyshuarin Ž.Z., viti i lindjes 1954, i dyshuar për veprën penale “Krime lufte kundër popullatës civile” të kryer gjatë vitit 1998-1999 në Komunën e Istogut”, thuhet në njoftim.
Ndërsa, Momir Pantiq, i arrestuar dy ditë më parë, akuzohet për përgjegjësi komanduese për disa ngjarje të ndodhura gjatë luftës në Kosovë në vitin 1999, në komunën e Istogut.
“I dyshuari M.P., është arrestuar sot, më 04.08.2023, në ora 18:05, në Pikën e Kalimit Kufitar në Merdare. Me aktvendim nga prokurori i njëjti është dërguar në mbajtje deri në 48 orë”, përfundon njoftimi i Policisë për Pantiqin.
