Gjykata Themelore në Gjilan ka aprovuar sot kërkesën e Prokurorisë për caktimin e masës së paraburgimit, prej 30 ditësh, ndaj të pandehurit T.L., raporton Gazeta Sinjali.

Gjykata vlerëson se ekziston dyshimi i bazuar se më 3 korrik të këtij viti, i pandehuri T.L., pas një mosmarrëveshje që kishte pasur me D.Rr., u ka shkaktuar lëndime trupore dy familjarëve të tij, I.Rr. dhe R.Rr., duke i goditur me një shufër metalike në fytyrë dhe në pjesët e tjera të trupit.

Për shkak të lëndimeve që u kishte shkaktuar T.L., ata kishin kërkuar ndihmë mjekësor në Spitalin Regjional të Gjilanit.

“Me këto veprime, i pandehuri T. L. dyshohet se ka kryer veprën penale ‘lëndim i rëndë trupor’. vepër e sanksionuar me Kodin Penal të Republikës së Kosovës (KPRK)”, thuhet në njoftimin e gjykatës.

Gjyqtarja e procedurës paraprake në Departamentin e Përgjithshëm, ka vlerësuar se qëndrojnë arsyet ligjore për caktimin e masës së paraburgimit ndaj të pandehurit, me qëllim të sigurimit të kushteve sa më normale për zhvillimin e procedurës penale./Gazeta Sinjali/