Gjykata Themelore në Prizren ka caktuar masën e paraburgimit ndaj Adnan Arifovic, të dyshuarit të katërt për tentim grabitjen dhe plagosjen e dyfishtë në argjendarinë, në Prizren, raporton Gazeta Sinjali.

Lajmin për Gazetën Sinjali e kanë konfirmuar nga kjo gjykatë.

Kjo masë e cila i është caktuar për 30 ditë, do t’i llogaritet nga data e arrestimit, 20 nëntor.

Ai dyshohet për veprën penale “Ndihma në grabitje”.

Burime brenda Prokurorisë i kanë thënë Sinjalit se Arifovic dyshohet se ka fshehur prova dhe ka ndihmuar Leotrim Latifin dhe Ibrahim Qadrakun, ditën kur ndodhi grabitje, duke i ndihmuar që të largohen dhe të fshihen.

Ai dyshohet se ka shkuar me veturë në Skenderaj për t’i marrë dy të dyshuarit.

Latifi dhe Qadraku me ndihmën e Arifovic, dyshohet që tentuan të grabisnin argjendarinë në Prizren, ku lanë të plagosur dy pronarët e saj, babë e bir. I arrestuari tjetër Ruzhdi Fejzullahu që dyshohet për ndihmë në grabitje, sipas burimeve të Sinjalit ua ka shitur veturën me të cilën ata shkuan deri të argjendaria ku ndodhi ngjarja dramatike.

Sinjali mëson nga burimet brenda Prokurorisë se i arrestuari i katërt, që u kap gjatë një bastisje të Policisë, Adnan Arifovic është fqinj me të dyshuarin Leotrim Latifi. Të njëjtit i ndanë vetëm një rrugë, në lagjen ku jetojnë.

Leotrim Latifi, Ibrahim Qadraku janë dërguar në paraburgim si të dyshuar se kanë kryer këto vepra penale:

grabitja në tentativë,
shkaktimi i rrezikut të përgjithshëm,
mbajtja në pronësi, kontroll ose posedim të paautorizuar të armëve ,
grabitja,
sulmi ndaj personit zyrtar,
shkaktimi i rrezikut të përgjithshëm dhe
asgjësimi apo dëmtimi i pasurisë.

Ndërsa Ruzhdi Fejzullahut i është caktuar masa e paraburgimit nën dyshimin se ka kryer veprën penale ndihma në grabitje.

Tre të dyshuarit që terrorizuan Prizrenin, në momentet e tentim grabitjes ikën me një veturë të zezë, e cila më pas u gjet e djegur. Për të mos mbaruar me kaq, të njëjtit grabitën një veturë të tipit Polo, të cilën po ashtu e dogjën, të hënën në mbrëmje.

Pasi tentuan t’i “zhdukin” gjurmët duke djegur veturën e parë, të dyshuarit grabitën një veturë tjetër, të cilën po ashtu e dogjën, por që fillimisht me të shkuan deri te pompa e derivateve “OK” në fshatin Korishë, ku u furnizuan me karburant. Më pas, ajo veturë u gjet e djegur në Mugë të Skenderajt.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata./GazetaSinjali/