Shteti gjerman është duke u përballur me mungesa të mëdha punëtorësh të profesioneve të ndryshme. Shumë kompani të mëdha nuk janë në gjendje që të marrin porosi për të kryer shërbime e punë për shkak të mungesës së punëtorëve dhe një gjë e tillë është duke u shkaktuar humbje të mëdha.

Për këtë arsye qeveria Federale në Berlin është duke kërkuar një numër të madh punëtorësh sidomos nga rajoni i Ballkanit, shkruan Al Jazeera.

Për të tërhequr sa më shumë punëtorë nga shtetet tjera, Gjermania tashmë ka hapur edhe një Zyrë në Bon ku do të koordinohen njohja e kualifikimeve profesionale të cilat janë marrë jashtë Gjermanisë.

Përveç kësaj qeveria gjermane gjithashtu ka filluar një program për të tërhequr profesionistë të huaj nën moton “Make it in Germany”, implementimi i të cilit do të jetë përparësi kombëtare.

“Pa profesionistë të huaj ne nuk do të jemi që të ruajmë mirëqenien tonë. Ne nuk mund të rrimë dhe thjeshtë të presim që këta njerëz të vijnë,  ne duhet të punojmë shumë për ta”, ka thënë Ministri për Punë në Qeverinë Federale, Hubertus Heil.

Se mungesa e punëtorëve është alarmante e thonë edhe nga Byroja Gjermane e Statistikave. Sipas tyre numri i shtetasve me moshë pune deri në vitin 2035 do të zvogëlohet prej 4 deri në 6 milionë. Një gjë e tillë po shihet si një rrezik i jashtëzakonshëm.

Ndërkohë Dhoma Gjermanisë Tregtisë dhe Industrisë sipas një ankete të realizuar ka konstatuar se 56 % e firmave që janë nënshtruar anketës kanë konstatuar rënie të punës si pasojë e mungesës së punëtorëve.

Për këtë gjë shteti gjerman pas shumë debatesh ka hartuar edhe një Ligj të ri të Punës dhe Emigracionit që do të futet në fuqi nga 1 marsi, e që do t’ua lehtësojë shtetasve të huaj të kualifikuar shkuarjen në Gjermani me qëllim të punësimit atje.

Të hënën në Bonn ndërkohë është hapur edhe Zyra Qendrore për Njohjen e Kualifikimeve Profesionale.

Qëllimi kryesor i ligjit të ri është të lehtësojë punëtorët e huaj në tregun gjerman të punës, pothuajse në të gjitha industritë.