Masivi pyjor i Aishteve në zonën e Mokrës në Pogradec e njohur si Guri i Nikës, është përfshirë nga zjarri.

Drejt vendngjarjes janë nisur punonjës të zonave të mbrojtura dhe emergjencat. Ndërhyrja po bëhet vetëm me mjete rrethanore pasi zona është terren malor dhe i thyer.

Forca të shumta operacionale, efektivë të Forcave të Armatosura, zjarrfikës, punonjës të emergjencave civile e shërbimeve vendore po punojnë për shuarjen e zjarreve në zona të ndryshme të vendit.

Vatra e zjarrit në fshatin Dukat i Ri, në Gadishullin e Karaburunit po vijon të jetë aktive, e cila paraqet rrezikshmëri, pasi ka përhapje në drejtim të Parkut Kombëtar të Llogarasë. Prej orëve të para të mëngjesit ka rinisur operacioni edhe nga ajri.

Në fshatin Thirrë në Fan të Mirditës zjarri nuk paraqet rrezik për banesa, ndërsa po vijon puna për shuarjen e tij. Zjarri në fshatin Munellë-Domgjon është izoluar në njërin krah, por po vijon puna në krahun tjetër, ku ende ka prani flakësh.

Prej ditës së djeshme po punohet për shuarjen e flakëve në masivin me pisha në fshatin Krushovë, në njësinë administrative Voskopojë. Prej orëve të para janë shtuar forcat e ndërhyrjes nga FA, zjarrfikësit si dhe struktura të tjera të bashkisë Korçë e bashkive fqinje.

Situatë e vështirë me zjarre ka qenë dje, në fshatin Patalej, njësia administrative Kolsh, bashkia Mirditë. Sot vazhdon zjarri në shkurre, ndërsa janë shtuar forcat operacionale.

Në fshatin Corrush në Mallakastër janë izoluar dy vatra, por puna vijon për izolimin e flakëve në tre vatra të tjera aktive, të cilat janë në terren të vështirë.

Në fshatin Bogë, njësia administrative Shkrel ka njoftuar se është aktivizuar një vatër zjarri mbrëmjen e djeshme dhe nuk paraqet rrezik për banesat.

Gjithashtu një vatër zjarri është njoftuar edhe në Parkun e Tomorrit në lartësinë mbi 1500 m, ku situata po ndiqet nga forcat vendore. /GazetaSinjali/