Sot, gastronomët do të protestojnë me automjete para objektit të Qeverisë së Kosovës, për të kundërshtuar masat e reja anti-COVID, shkruan Gazeta Sinjali.

Kryetari i Shoqatës së Gastronomëve, Petrit Kllokoqi, dje bëri të ditur se protesta parashihet të mbahet në orën 21:30. Sipas tij kjo protestë do të bëhet me sirena të automjeteve.

“Nesër, e diele, ora 21:30, ftoj të gjithë gastronomët që të dalim para Qeverisë, duke i marrë automjetet tuaja për të protestuar kundër masave të reja, me sirena”, shkroi dje në Facebook ai.

Shoqata e Gastronomëve të Kosovës i ka vlerësuar si të pakuptimta masat e reja të cilat kufizojnë veprimtaritë biznesore.

“Masat nuk kanë kuptim që të kufizojnë veprimtaritë biznesore, por të stimulojnë vaksinimin e popullatës, si zgjidhja e vetme për daljen nga kjo krizë”, shkruhet në postimin e tyre.

Bazuar në masat e reja anti-COVID, maska do të vazhdojë që të jetë obligative për qytetarët e vendit.

Kufizimi i qarkullimit të qytetarëve do të jetë nga ora 00:00 deri në ora 05:00.

Edhe pas kësaj mbledhjeje Qeveria vazhdon që të ndalojë veprimtarinë e klubeve të natës, si dhe organizimi i festivaleve, koncerteve, ekskursioneve, pelegrinazheve, dasmave, fejesave, ahengjeve familjare dhe shoqërore,  në të gjithë territorin e Republikës së Kosovës./Gazeta Sinjali/