Sot është raportuar se presidenti i Kosovës, Hashim Thaçi ka shkuar në Klinikën e Urologjisë në QKUK, ku i ka bërë analizat dhe ka marrë trajtimin për dhimbjet që shkaktojnë gurët në veshkë.

Nëse paraqitet nevojë për veshkë për presidentin Thaçi tashmë janë paraqitur disa vullnetarë. Një bashkëluftëtar i tij thotë se për këtë të fundit është në gjendje të japë gjithçka.

Veterani i UÇK-së, Zeqir Rexhepi thotë se nuk do të kursente asgjë nga vetja e tij për të ndihmuar bashkëluftëtarët. Këto fjalë Rexhepi nga fshati Qirez i Skenderajt i vërtetoi të hënën kur dëgjoi se presidenti është i sëmurë dhe kërkoi ndihmë mjekësore.

Ai i ofroi veshkën e tij shefit të shtetit me të cilin e lidh veprimtaria në kohë lufte.

“Çdo pjesë të trupit jam në gjendje me e dhanë jo vetëm për presidentin por për të gjithë ata që i njoh që kanë kontribu gjatë luftës “, tha ai për Klan Kosovën.

Ai tha se gjatë ditëve të vështira për popullin shqiptar presidenti kishte shërbyer si frymëzim për të ecur përpara.

Rexhepi në luftë humbi vëllanë dhe axhën që i ranë dëshmorë.