Delegacionet teknike të Ministrisë së Punëve të Brendshme të Republikës së Kosovës dhe Republikës Franceze, kanë mbajtur një video-konferencë dy ditore, ku diskutuan në lidhje me bashkëpunimin në luftimin e krimit të organizuar, terrorizmit dhe ekstremizmit të dhunshëm, menaxhimin e migrimit dhe kontrollit kufitar.
Kryesues i delegacionit të Republikës së Kosovës ka qenë Sekretari i përgjithshëm në Ministrinë e Punëve të Brendshme, Lulzim Ejupi, ka falënderuar Qeverinë e Republikës Franceze për përkrahjen dhe mbështetjen në proceset integruese dhe zhvillimin institucional në fushën e sigurisë.
Temë e diskutimit të këtyre takimeve kanë qenë çështjet që kanë të bëjnë me aspektin e sigurisë nacionale dhe transnacionale, me theks të veçantë në migrimin e rregullt dhe të parregullt.
Gjatë këtij takimi palët kanë shkëmbyer praktika dhe përvojat që këto dy shtete i kanë në fushën e sigurisë si dhe të migrimit.
Të dyja delegacionet theksuan nevojën e vazhdueshme që të thellohet bashkëpunimi bilateral në të ardhmen për sa i përket këtyre dy fushave.
Vlen të theksohet se këto takime institucionale të nivelit të lartë janë si rrjedhojë e takimeve të mbajtura në mes të Kryeministrit Hoti dhe Presidentit Makron dhe në të ardhmen pritet të mbahen edhe takime tjera.
