Presidenti i FC Prishtinës, Remzi Ejupi, është dënuar me ndalesë në kryerjen e të gjitha funksioneve zyrtare në klub në raport me FFK-në në kohëzgjatje për 1 vit, shkruan Sporti në Sinjali.
Ky vendim është marrur sot nga Komisioni Disiplinor i shkallës së parë në përberje; Met Çeku – kryetar dhe Dukagjin Zefi, Luan Salihu, Avni Shala dhe Bekim Behrami – anëtarë.
Vendimi i publikuar nga FFK:
“REMZI EJUPI; kryetar i FC PRISHTINA nga Prishtina për shpifje dhe përhapje të pavërtetave ndaj Federatës së Futbollit të Kosovës dhe anëtarëve të saj dënohet me ndalesë në kryerjen e të gjitha funksioneve zyrtare në klub në raport me Federatën e Futbollit të Kosovës në kohëzgjatje për ; 1 (një) vit”.
Arsyetimi i publikuar nga FFK:
“Komisioni Disiplinor i shkallës së parë në rastin e shqyrtimit të rastit për bazë pati të gjitha shkrimet e publikuara si dhe incizimet televizive të transmetuara në; Insport.com (gazetë online) nga ana e kryetarit të FC Prishtina, z. Remzi Ejupi i cili shpif dhe përhap të pavërteta për Federatën e Futbollit të Kosovës në pretendimet e tij të cituara përmes fjalëve; “skandali“ “keqpërdorimet”, “privatizimi“ , “grup njerëzish”, “infektimi i përzgjedhësit Bernard Challandes”, “humbja e ndeshjes ndaj Sllovenisë” dhe “dyshimet në bastore” e të tjera, për të cilat z. Remzi Ejupi ishte i obliguar që në kohën e përcaktuar nga ana e Komisionit të sjellë fakte dhe të sigurojë prova për të gjitha këto të thëna, por një gjë e tillë nuk ndodhi, andaj komisioni disiplinor i shkallës së parë duke respektuar Dispozitat e Rregullores disiplinore; neni 61 Paragrafi 1 pika b; sjellë vendimin e lartshënuar për dënimin e z. Remzi Ejupi kryetar i FC Prishtina me ndalesë për kryerjen e të gjitha funksioneve zyrtare në klub në kohëzgjatje për; 1 (një) vit në raport me Federatën e Futbollit të Kosovës”.
FFK gjithashtu ka njoftuar se Ejupi ka të drejtë ankese drejtuar Komisionit disiplinor të shkallës së dytë; komisionit për ankesa në afatin kohor prej tetë ditëve nga data e sjelljes së vendimit, respektivisht pranimit të tij. Ankesa e ushtruar nga ana e palës së ankimuar nuk e ndalon ekzekutimin e vendimit.
