Kapiteni i Policisë së Kosovës, Ragip Bytyqi ka shpëtuar mrekullisht nga një sulm me thikë të cilësuar si “tentim vrasje” nga Policia.

Sinjali mori vesh nga burimet se Bytyqi ishte sulmuar nga një person me të meta mendore.

Sulmin e ka konfirmuar edhe zëdhënësi i Policisë për rajonin e Pejës, Driton Rugova.

“Sot rreth orës 11:55 në rrugën “Mbreteresha Teutë” ka ndodhur një rast ku është sulmuar papritmas një zyrtar policor i cili ka pësuar lendime trupore nga një mjet i mprehtë (thikë)”, ka deklaruar Rugova për Sinjalin.

Ai më tej ka treguar se si ka arritur t’i shpëtojë vdekjes kapiteni policor.

“Falë shkathtësive profesionale të zyrtarit policor dhe ndihmës së një qytetari është arritur që viktima të shpetoj me jetë”, ka thënë Rugova.

Policia ka konfirmuar se “sulmuesi është arrestuar, ndërkaq kapiteni policor është jashtë rrezikut për jetë”.

Me urdhër të prokurorit, sulmuesi është dërguar në mbajtje, ndërsa rasti është cilësuar si “Vrasje në tentativë”.

Policia thotë se hetuesit do të ndërmarrin të gjitha veprimet e nevojshme për t’i kuptuar rrethanat e këtij sulmi. /Sinjali