Lideri serb i Bosnje dhe Hercegovinës, Milorad Dodik, i cili u akuzua për rrezikim të luftës për të shpërbërë Bosnjën e ka krahasuar veten e tij me ish-kryeministrin e Mbretërisë së Bashkuar, David Cameron, me përpjekjet e këtij të fundit për të rinegociuar kushtet e anëtarësimit të Britanisë në BE, përpara referendumit të Brexit.
Dodik tha se shkëputja e Republika Srpska nga Bosnja do të ishte e mundur vetëm në rast se kërkesa e tij do të refuzohej për të rimarrë kontrollin e administratës tatimore, gjyqësorin dhe ushtrinë.
Ai në parlamentin e Republika Srpska tha se synon të ketë një periudhë gjashtë-mujore me negociata së bashku me udhëheqësit kroat dhe boshnjak, në lidhje me një marrëveshje të re, shkruan The Guardian.
Sipas tij, kjo erdhi pasi politikanët vendas mbështetën një rezolutë sipas të cilës etnitetet do të merrnin në mënyrë të njëanshme kompetencat ekzekutive nëse do të ishte e nevojshme.
Dodik tha se fjalimi i tij ishte mbështetur në “fjalimin e Bloomberg” të Cameron në 2013, në të cilin kryeministri i Mbretërisë së Bashkuar kishte paraqitur kërkesat për kushte të reja të anëtarësimit të Britanisë në BE.
“Në këtë fjalim, unë zëvendësova Britaninë e Madhe me Republikën Srpska dhe Bosnje dhe Hercegovinën me Bashkimin Evropian”, tha Dodik.
Në atë kohë, Cameron tha se riatdhesimi i disa fuqive larg BE-së në Britani do të çonte në një zgjidhje të re që do ta ndihmonte atë të fitonte një referendum të BE-së në vitin 2017.
