Gazeta Sinjali pak më parë raportoi ekskluzivisht për aksionin e Policisë së Kosovës në rajonin e Prizrenit, i cili ka rezultuar me arrestimin e dhjetëra personave të përfshirë në trafikimin me migrantë. Me urdhër të Gjykatës Policia ka kryer bastisje në disa lokacione, ku një nga personat që u arrestua, me qëllim të pengimit të bastisjes, fillimisht tentoi që t’i sulmojë zyrtarët policorë, duke iu sulur atyre me veturë.
Sinjali mëson ekskluzivisht nga burimet e veta brenda Prokurorisë, se i dyshuari që u vu nën kontroll nga Policia, është Skender Arifaj, 53-vjeçar.
Arifaj është gjobitur për rrezikim të trafikut dhe ndaj tij është iniciuar rasti ‘Pengim në kryerje të detyrës zyrtare’. Me urdhër të prokurorit ai është ndaluar për 6 orë, teksa pritet të ngritët kallëzim penal ndaj tij.
Arrestimin e Arifajt për Sinjalin e ka konfirmuar edhe zëdhënësi i Policisë së Kosovës për Rajonin e Prizrenit, Shaqir Bytyqi, i cili tha se lidhur me rastin një person ka përfunduar në pranga të Policisë, pasi i ka penguar policët në detyrë zyrtare.
Po ashtu gjatë bastisjes në një shtëpi në fshatin Shkozë, është gjetur një shtetas sirian i cili dyshohet se është kontrabandues i migrantëve.
Ndryshe, Sinjali mëson se në mesin e të arrestuarve, ka edhe persona që lidhen me agjenci turistike që merren transportin e udhëtarëve brenda dhe jashtë vendit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.