Deputeti i Partisë Demokratike të Kosovës, Ferat Shala, e ka quajtur si alarmante situatën në Trust.
Shala ka thënë se vetëm gjatë këtij muaji janë humbur 60 milionë euro, ndërkohë që gjatëv vitit 2022, kontribuesit e vendit kanë humbur deri në 118 milion euro.
Sipas tij, Qeveria ende nuk ka vendosur borxhin menaxhues dhe rreth 3 miliardë euro janë në mëshirë të askujt.
Ai ka shtuar se po vërtetohet se kërkesa e PDK-së për tërheqjen e mjeteve të Trustit nga qytetarët ka qenë e drejtë.
Postimi i tij i plotë:
Humbjet në Trust gjatë këtij muaji, janë rreth 60 milion euro!
Situata në Trust është alarmante!
Gjatë vitit 2022, të gjithë kontribuesit e vendit kanë humbur hiq më pak se 118 milion euro mjete të tyre në Trust. Trendi i rënies së aksioneve është në situatë shqetësuese edhe këtë vit.
Vetëm gjatë këtij muaji që jemi tani, konkretisht nga data 1 mars deri më sot, në Trust kemi humbur rreth 60 milion euro!
Përkundër kësaj situate, Qeveria ende nuk e ka vendosur bordin menaxhues. Rreth 3 miliard euro të Trustit janë në mëshirën e rrethanave dhe kohës, nën mëshirën e tregjeve globale, praktikisht nën mëshirën e askujt!
Jo shumë larg nga tash, kur Partia Demokratike kërkonte që një pjesë e mjeteve t’iu kthehej qytetarëve, atyre që kishin kontribuar, Qeveria dhe mazhoranca me këmbëngulje refuzuan dhe votuan kundër, në emër të ruajtjes së skemave sociale për moshën e penzionimit.
Koha po e vërteton kërkesën e drejtë e legjitime të qytetarëve për Trustin, sidomos sot kur humbjet janë në total rreth 200 milion euro.A ka Qeveri ky vend?!
