Kryetari i Odës Ekonomike Amerikane në Kosovë, Arian Zeka, tha se është veprim negativ që sot deputetët nuk e votuan Projektligjin për Rimëkëmbje Ekonomike.

“Bizneset po ballafaqohen me shumë vështirësi. Nivelet e qarkullimit janë dukshëm më të ulëta se para shpërthimit të pandemisë. Duhet të shihet me shqetësim kjo, por befasia tjetër është që deputetët nuk po e shohin me shqetësim”, tha Zeka.

Ai tha se Pakoja për Rimëkëmbjen Ekonomike duhet votuar për shkak se shumë biznese janë duke humbur.

“Në anën tjetër, diaspora shihet se nuk do të mund të japë kontributin e vet të plotë”, tha ai në Interaktiv.

Zeka shtoi se kanë kërkuar lehtësim të qasjes në financa, që është problemi më i madh te bizneset, por nuk është realizuar.

“Bizneset më së shumti janë ballafaquar me likuiditetin”, tha ai. /Gazeta Sinjali/