Sot gjatë ditës, ministra dhe përfaqësues të agjencive të pavarura kanë diskutuar në Komisionin për Ekonomi, Punësim, Tregti, Industri, Ndërmarrësi dhe Investime Strategjike në lidhje me rekomandimet e dala nga “Raporti për vitin 2020 i Komisionit Evropian”.
Në këtë takim u tha se ka pasur progres në disa fusha, por ka ende punë për t`i zbatuar në tërësi të gjeturat e Bashkimit Evropian.
Ministri i Mirëqenies Sociale, Skender Reçica para anëtarëve të komisionit i paraqiti disa nga synimet e dikasterit të tij për të zbatuar rekomandimet e BE-së.
“Do të procedojmë tutje edhe me Projektligjin e punës dhe lehonisë si dhe Plotësim-ndryshimin e disa projektligjeve që kanë të bëjnë me fusha tjera të marrëdhënies së punës është synimi ynë. Por sfidë mbetët edhe zbatimi konkret i ligjeve në aspektin e marrëdhënieve të punës”, tha ai.
Kurse, ministri i Tregtisë dhe Industrisë, Vesel Krasniqi, derisa tregoi angazhimin e tij për zbatim të rekomandimeve të BE-së, tha se sfidë është edhe shkurtimi i buxhetit.
“Sfidë për zbatimin e këtyre rekomandimeve sa i përket industrisë është buxheti pasi jemi në pandemi dhe po ka shkurtime buxhetore”, tha ai.
Nga ZRrE, Arsim Janova tha se në bazë të raportit të BE-së do të angazhohen për planin e efiçiencës së energjisë dhe tarifat e saj.
