David de Gea thuhet se është i frustruar dhe i mërzitur me vendimin e Luis Enrique për të mos e thirrur atë për miqësoret e Spanjës me Shqipërinë dhe Islandën, duke hedhur dyshime mbi të ardhmen e tij ndërkombëtare, transmeton Sinjali Sport.
Numri 1 i Manchester United u la jashtë nga skuadra e Enriques, me ish-trajnerin e Barcelonës që vendosi të thërriste Unai Simon, David Raya dhe Robert Sanchez në vend të tij.
Sipas gazetës spanjolle AS, De Gea nuk e mori mirë vendimin për t’u lënë jashtë nga Enrique dhe është i mërzitur me menaxherin, pavarësisht se Enrique e thirri atë për të shpjeguar vendimin përpara se të shpallte skuadrën e tij.
‘AS’ raporton se De Gea nuk ishte i bindur për arsyetimin e Enriques se ai donte të testonte portierë më të rinj gjatë pushimit ndërkombëtar.
Ndërsa kampi i De Geas pretendon se nuk kishte asnjë justifikim për largimin e tij, ‘AS’ po raporton gjithashtu se Enrique po sugjeron që portieri nuk donte të thirrej përsëri derisa të bëhet e qartë se cili është roli i tij në ekip.
Megjithatë, 31-vjeçari tani thekson se nuk do të kthehet në kombëtare në asnjë cilësi, pavarësisht nëse ai është numri 1 apo numri 2 nën Enrique.
De Gea ka qenë një nga portierët më në formë këtë sezon në Premierligë, duke e shpëtuar Manchester United në shumë ndeshje me pritjet e tij.
