Mediat në Shqipëri vijojnë të shkruajnë për ngjarjen tragjike që ndodhi ditën e djeshme në Velipojë, ku u mbyt 17-vjeçarja që po bënte xhiro me 25-vjeçarin me motor uji.

Raportohet se 25 vjeçari Indrit Bajraktari është nxjerrë nga deti nga motori i sigurisë. Ndërsa çelësi i motorit të ujit është gjetur i varur në qafën e 17-vjeçares, Enisa Doda.

Sipas protokollit, çelësi është i lidhur me varëse që përdoret në rast se mjeti i lundrimit fiket dhe qëndron në vend.

Punonjës të pikës së dhënies me qira të motorëve të ujit kanë deklaruar se njëri prej tyre i ka vëzhguar ata, të cilët sipas tyre kanë qenë të pajisur edhe me jelekë shpëtimi.

Në momentin që punonjësit e pikës së dhënies me qira të motorëve të ujit, janë hasur me djalin i cili ka qenë i zhytur, ai u ka thënë se vajzën e ka nxjerrë në breg dhe ia ka dorëzuar xhaxhait.

Ata e kanë marrë të riun dhe e kanë nxjerrë nga deti duke e mbajtur të izoluar deri në mbërritjen e policisë në vendngjarje.

Ndërsa, sipas policisë i riu ka dalë nga deti pa motorin e ujit rreth dy orë e gjysmë pasi ishte futur në ujë bashkë me 17-vjeçaren./Gazeta Sinjali/