image Çollaku zbulon se Hashim Thaçi ishte intervistuar nga Specialja në fillim të vitit 2020

Politikë

Çollaku zbulon se Hashim Thaçi ishte intervistuar nga Specialja në fillim të vitit 2020

news image

Ndonëse dorëheqje dha në nëntor të vitit 2020, bashkëpunëtori më i afërt i Hashim Thaçit, Bekim Çollaku, ka bërë të ditur se ish-presidenti ishte intervistuar nga Zyra e Prokurorit të Specializuar me seli në Hagë në fillim të vitit 2020.

“Hashim Thaçi në fillim të vitit 2020 kishte marrë ftesë nga Zyra e Prokurorit të Specializuar në Hagë për t’u intervistuar. Ai ka dhënë intervistë atëherë dhe kjo është bërë e ditur në dokumentet zyrtare që janë të publikuara”, tha Çollaku.

Ai në Rubikon ka deklaruar se Thaçi e ka konsideruar si të vonuar dorëheqjen e tij nga pozita e presidentit pas ftesës që e kishte pranuar nga Specialja.

Presidenti [Hashim] Thaçi ka mundur të mos japë dorëheqje, sepse nuk ka asnjë bazë ligjore që ia imponon një zyrtari të shtetit këtë pas ngritjes së një aktakuze. Ai e ka konsideruar si të vonuar dorëheqjen e tij duke e llogaritur se duhej të jepte dorëheqje në momentin kur kishte marrë ftesën e parë nga kjo gjykatë për t’u intervistuar. Ai e ka vendosur interesin shtetëror përpara duke dhënë dorëheqje për të mos i dëmtuar institucionet e Kosovës”, shtoi tutje Çollaku. /Gazeta Sinjali/