Kadri Veseli i njohur me nofkën “Luli” gjatë luftës së Ushtrisë Çlirimtare të Kosovës (UÇK), nuk ka pranuar ndonjë pyetje nga gazetarët, përderisa ka treguar shumë shkurt për ftesën e tij nga Gjykata Speciale.

Megjithatë, Kadri Veseli, nuk ka treguar nëse është i ftuar në cilësinë e të dyshuarit dhe as nëse është i ftuar në cilësinë e dëshmitarit nga Dhomat e Specializuara të Gjykatës Speciale me seli në Hagë, raporton Gazeta Sinjali.

Veseli ka thënë vetëm se ka pranuar ftesën nga Gjykata Speciale, pa përmendur cilësinë.

“Si njëri nga udhëheqësit e UÇK-së unë sot kam pranuar ftesë nga Dhomat e Specializuara për t’u intervistuar më 4 dhjetor në Hagë. Ashtu siç jam zotuar se në momentin që do ta kisha një ftesë të tillë unë do ta bëja publike”, ka treguar ndër të tjera Veseli.

Ai më tutje ka folur me krenari për aktivitet e tij gjatë luftës në Kosovë si dhe për proceset gjykuese që UÇK-ja ka kaluar që nga koha e pas luftës. Ai ka thënë se mburret me të gjithë aktivitetin e tij që e ka bërë.

“Nga mesi i viteve 80- ta unë kam hyrë me ideal në organizata patriotike për ta kundërshtuar robërinë. Epoka e UÇK-së është epoka më krenare e jetës sime. Kam qenë i bekuar që isha njëri ndër ideatorët dhe themeluesit e saj deri në çlirimin e vendit nga prilli i vitit 1999 deri në vitin 2008 kam udhëhequr SHIK-un”, ka deklaruar Veseli./Gazeta Sinjali/

Fjalimi i plotë:

Fjalimi i plotë i Kadri Veselit:

Përshëndetje të gjithëve! Si një nga udhëheqësit e Ushtrisë Çlirimtare të Kosovës, unë sot kam pranuar ftesë nga Dhomat e Specializuara, për t’u intervistuar më 4 dhjetor në Hagë.

Ashtu siç jam zotuar, se në momentin që do ta kisha një ftesë të tillë, unë do ta bëja publike. Gjenerata ime, si shumë gjenerata të tjera, ka përjetuar shtypjen e rëndë të kombit tonë. Ne nuk jemi pajtuar me atë gjendje, dhe unë jam krenar që i jam përgjigjur thirrjes së vendit për lirinë e kombit.

Gjithë jetën kam qenë i angazhuar për të mirën e Kosovës dhe këtë e kam bërë tërësisht në baza vullnetare dhe me përkushtimin më të lartë.

E kam nisur si fëmijë, si nxënës i shkollës fillore në Mitrovicë, me demonstratat e prillit të vitit 1981, si pjesëmarrës, e pastaj në shumicën prej tyre edhe si organizator dhe drejtues.

Nga mesi i viteve ’80, unë kam hyrë me ideal në organizatat patriotike, anti-jugosllave, për ta kundërshtuar robërinë dhe për të punuar për lirinë. Epoka e Ushtrisë Çlirimtare të Kosovës – është pjesa më krenare e jetës sime.

Kam qenë i bekuar që isha një ndër ideatorët dhe themeluesit e saj, luftëtar i lirisë deri në çlirimin e vendit. Nga prilli i vitit 1999, deri në qershor të vitit 2008, kam udhëhequr Shërbimin Informativ të Kosovës.

Të gjitha këto angazhime i kam bartur me nder dhe përgjegjësi të plotë, e me krenari të jashtëzakonshme. Të nderuar qytetarë, Përpjekjet e kombit tonë për liri – kanë qenë jeta jonë. Të gjithë së bashku arritëm lirinë dhe Ushtria Çlirimtare e Kosovës është simboli i saj.

Por, duhet pranuar një fakt, lufta e drejtë e popullit tonë për liri ka qenë e sulmuar vazhdimisht. Që nga paslufta, ky është procesi i pestë i drejtësisë – të cilës i nënshtrohet kjo luftë.

Duke filluar nga UNMIK-u, e për të vazhduar me Gjykatën e Hagës, EULEX-in, drejtësinë vendore, dhe tani me Gjykatën Speciale.

Nuk besoj që në historinë e lëvizjeve çlirimtare të ketë pasur një shembull të tillë.

Edhe ky proces duhet të ketë epilog, duke u bazuar në të vërtetën, faktet e drejtësinë, dhe që nuk e dëmton shtetin e Kosovës në pafundësi.

Jam i bindur se edhe kjo Gjykatë do ta vërtetojë luftën e drejtë të Ushtrisë Çlirimtare të Kosovës, por edhe që do t’i ndalë goditjet ndaj të vërtetës së popullit tonë dhe Ushtrisë Çlirimtare të Kosovës.

Unë do t’i përgjigjem kësaj ftese, më 4 dhjetor.​