Dardan Krivaqa dhe Arbër Sejdiu, të cilët akuzohen se me dashje dhe në bashkëkryerje e kanë privuar nga jeta 18-vjeçaren, Marigona Osmani, pritet që ta dalin para gjyqit më 14 korrik 2022, me fillim nga ora 10:00.
Lajmin për Sinjalin e kanë konfirmuar nga zyra për informim e Gjykatës Themelore në Ferizaj.
Sipas aktakuzës së Prokurorisë, më 22 gusht 2021, të pandehurit Dardan Krivaqa dhe Arbër Sejdiu, me dashje dhe në bashkëkryerje e privojnë nga jeta tani të ndjerën Marigona Osmanin.
Me çka në bashkëkryerje, akuzohet se kanë kryer veprën penale “Vrasja e rëndë” nga neni 173, paragrafi 1, nënparagrafi 1,3, 1,4 dhe 1.7, lidhur me nenin 31 të Kodit Penal.
Po ashtu, sipas Prokurorisë, për të pandehurin Krivaqa, ekziston dyshimi i bazuar se i njëjti ka kryer veprën penale “Dhunimi” nga neni 227, paragrafi 4, nënparagrafi 4.1 lidhur me paragrafin 1 të Kodit Penal.
Ndërsa, thuhet se i pandehuri Arbër Sejdiu, me dashje i ka ndihmuar të pandehurit Dardan Krivaqa, në kryerjen e veprës penale të dhunimit.
Me çka, akuzohet se kreu veprën penale “Ndihmë në kryerjen e dhunimit” nga neni 227, paragrafi 4, nënparagrafi 4.1 lidhur me paragrafin 1 dhe nenin 33 të KPRK-së.
“Prokuroria Themelore në Ferizaj, me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtorë për veprat penale për të cilat akuzohen dhe të dënohen sipas ligjit”, thuhet në njoftim.
Ndryshe, Sahit Krasniqi është caktuar si gjyqtar i lëndës.
Së fundmi në media, janë publikuar pjesë të aktakuzës e cila përmban dëshmi me video të torturës mizore që dy të akuzuarit kishin bërë ndaj 18-vjeçares.
Sipas Prokurorisë Marigona është dhunuar seksualisht, pastaj është rrahur mizorisht nga dy të dyshuarit, ndërsa dëshmitë e këtij krimi janë faktuar edhe nga pamjet e kamerave që Dardan Krivaqa kishte vendosur për ta monitoruar të renë, me të cilën kishte filluar të bashkëjetonte.
