Kryetari i komunës së Podujevës, Shpejtim Bulliqi, ka folur rreth shtyrjes së vizitës për në SHBA.
Ai tha se vizat amerikane i kanë marrë, mirëpo shtyja, sipas Bulliqit, ka qenë kërkesë ekskluzivisht e tij për shkak të kohës.
“E informova opinionin publik edhe mbrëmë, kemi marrë viza amerikane, i kemi këto viza. Është dashur të nisemi drejt Amerikës, ka qenë një takim i organizuar nga MAPL dhe faktikisht në atë takim ka qenë e paraparë të lëviziim disa kryetarë të komunave nga të gjitha partitë, por duke marrë parasysh situatën aktuale dhe se ministri Krasniqi nuk mund të largohet nga vendi, kemi kërkuar të shtyhet kjo vizitë për një moment tjetër në Iowa të SHBA-së.
“Arsyeja e shtyrjes është arsye praktike për shkak të gjendjes së krijuar tek ne. I kam telefonuar organizatorët e kësaj vizite dhe u kam kërkuar falje, sepse kam angazhime. Më vonë e kuptova përmes komunikimiy që edhe ministri Elbert Krasniqi nuk mundet të lëvizë, prandaj ishte kërkesë e të gjithëve që kjo vizitë të shtyhet për një moment më të përshtatshëm. Shtyrja nuk ka të bëjë fare me dezinformatat e publikuara në portale. Po iu them sinqerisht, është ekskluzivisht kërkesë e imja për shkak të kohës”, tha ai në Frontal.
