Zëvendëskryeministri i Republikës së Kosovës, Besnik Bislimi, gjatë ditës së sotme ka vizituar Rexhep Selimin dhe Jakup Krasniqin të cilët ndodhen në Hagë.
Bislimi i përshkroi si momente të cilat ikën shpejtë, duke e krahasuar tre orëshin që kaloi me ta, si një 30 minutësh, shkruan Gazeta Sinjali.
“Sot vizitova në Hagë mikun tim Rexhep Selimin. Si gjithnjë i disponuar dhe me besim të plote në drejtësi. Edhe pse larg Kosoves, nuk i kishte ikur as edhe një detaj i vetëm nga zhvillimet politike në vend. Gjithashtu pashë edhe bacën Jakup që po mbahej jashtëzakonisht mirë. Tri orë ikën si 30 minuta“, ka shkruar Bislimi në profilin e tij në Facebook.
Nga ajo çfarë ka shkruar zëvendëskryeministri, lë të kuptohet se ai nuk i ka takuar ish-krerët tjerë të UÇK-së, ndërsa arsyeja nuk dihet.
Para Bislimit, në vizitë në Holandë ishte edhe kryeparlamentari Glauk Konjufca, si dhe ministrja e Drejtësisë, Albulena Haxhiu, me të cilën Thaçi dhe Veseli, nuk pranuan të takohen.
