Ambasadorët e Këshillit të BE-së sot kanë aprovuar tekstin e miratuar nga përfaqësuesit e Parlamentit dhe Këshillit Europian për liberalizimin e vizave të Kosovës.
Për këtë ka reaguar zëvendëskryeminsitri Besnik Bislimi, i cili tha se tashmë ky proces është në përfundim e sipër.
“Sot është miratuar nga ambasadorët e BE-së teksti mbi liberalizimin e vizave për Kosovën. Një hap tutje, tejet i rëndësishëm, që do të pasohet me aprovimin formal të rregullores mbi heqjen e vizave nga Parlamenti Evropian dhe Këshilli i BE-së”.
Bislimi tregoi se cilët janë faktorët kryesor që kanë ndikuar për ecjen drejt liberalizimit të vizave.
“Tashmë jemi drejt përfundimit të suksesshëm të këtij procesi të tejzgjatur për qytetarët e Republikës së Kosovës. Sukseset e arritura nga Qeveria veçanërisht në sundim të ligjit, puna jonë e vazhdueshme me shtetet anëtare dhe mbështetja e partnerëve tanë strategjikë, ishin faktorë kryesorë në avancimin e këtij procesi që ishte bllokuar për vite me radhë”.
Ai tha se me finalizimin e liberalizimit të vizave, Kosova do të jetë një hap më afër BE-së e proceseve të integrimit europian.
Ndryshe, ambasadorët e Bashkimit Evropian kanë miratuar tekstin e kompromisit për liberalizimin e vizave për Kosovën përpara miratimit përfundimtar nga Këshilli i BE-së. Kështu është bërë e ditur sot nga Presidenca Çeke e Këshillit të Bashkimit Evropian përmes Twitter-it.
